وزیر داخلہ سیلمان سوئیلو نے امریکی سفیر کو کھری کھری سنا دیں، “ترکیہ سے اپنے گندے ہاتھ اٹھالو”

یورپی ممالک کے سفیروں کا اپنا آلہ کار مت بناو

ترکیہ کے وزیر داخلہ  سیلمان سوئیلو  نےانطالیہ میں  میں خطاب کرتے ہوئے  کہا کہ حالیہ دنوں میں چند ایک یورپی ممالک کی جانب سے ان کے قونصل خانوں کو بند کیے جانے کے پیچھے امریکہ کا ہاتھ ہے۔  انہوں نے  ترکیہ میں کھیلے جانے  والے کھیل  کے پیچھے امریکہ کا ہاتھ ہونے کا بڑے برملا اظہار کرتے ہوئے کہا کہ امریکہ کو اب اس قسم کا کھیل کھیلنے سے باز آجانا چاہیے۔

انہوں نے امریکی سفیر کو مخاطب  کرتے ہوئے کہا کہ  آپ  ترکیہ  میں جن اخبارات کوڈکٹیٹ کرتے ہیں مجھے ان کا پتہ ہے  میں واضح طور پر کہتا ہوں  اپنے گندے ہاتھ ترکیہ سے ہٹالو ۔ آپ کیا کچھ کررہے ہیں ہمیں سب معلوم ہے ۔ آپ جو اقدامات اٹھا رہے ہیں ان سے بھی

ہمیں آگاہی حاصل ہے ، آپ ترکیہ میں کس طرح  گڑبڑ پیدا کرنا چاہتے ہیں ، ہمیں سب معلوم ہے۔ آپ کا چہرہ بے نقاب ہو چکا ہے۔

انہوں نے کہا کہ ترکیہ کی  بدقسمتی ہے کہ ترکیہ  آنے والا ہر امریکی سفیر جیسے ہی ترکیہ میں قدم رکھتا ہے اس کا مقصد ترکیہ میں جلد از جلد بغاوت  کے لیے زمین ہموار کرنا ہوتا ہے۔  یہ مسئلہ  ہر  امریکی سفیر کا مسئلہ ہے۔  ہر امریکی سفیر ، میں  ترکی کو کیسے نقصان پہنچا سکتا ہوں، اپنے باپ دادا کو کیسے فائدہ پہنچا سکتا ہوں کی سوچ کے ساتھ ترکیہ آتا ہے  اور یہ برسوں سے ایسا ہی ہوتا آرہا ہے اور وہ  دیگر ممالک کے سفیروں کے کانوں میں بھی ایسی ہی کھسر پھسر کرتے ہیں اور یورپ کے سفیروں کے ساتھ مل کر ہی پلان بناتے ہیں۔

اصل میں امریکہ ہی یورپ کو چلا رہا ہے۔ حالیہ دنوں میں چند ایک یورپی ممالک کی جانب سے ان کے قونصل خانوں کو بند کیے جانے کے پیچھے امریکہ کا ہاتھ ہے ۔ یہ ترکیہ کو بھی ڈکٹیٹ کرنا چاہتے ہیں لیکن ترکیہ کبھی بھی ان کے کھیل میں نہیں آئے گا۔ وہ صدر رجب طیب ایردوان  کو ڈکٹیٹ نہیں کرسکتے۔ اب وہ دور گزر چکا ہے۔ اب ترکیہ میں   صدر ایردوان کا دور ہے ۔