وزیراعظم شہباز شریف کی صدر رجب طیب ایردوان سے انطالیہ ڈپلومیسی فورم کے موقع پر ملاقات ہوئی ہے۔
انطالیہ ، وزیراعظم محمد شہباز شریف نے آج یہاں 5ویں انطالیہ ڈپلومیسی فورم کے موقع پر ترکیہ کے صدر رجب طیب ایردوان سے اہم دوطرفہ ملاقات کی، جس میں باہمی تعلقات، علاقائی صورتحال اور امن کے فروغ سے متعلق امور پر تفصیلی تبادلۂ خیال کیا گیا۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر اطلاعات عطا اللہ تارڑ اور دیگر اعلیٰ حکام شریک تھے، جبکہ ترک وفد کی جانب سے وزیر خارجہ حقان فیدان اور سینئر سرکاری شخصیات بھی موجود تھیں۔
صدر ایردوان نے وزیراعظم کا پرتپاک استقبال کرتے ہوئے انطالیہ ڈپلومیسی فورم میں شرکت پر ان کا شکریہ ادا کیا اور اس عالمی پلیٹ فارم کی اہمیت کو سراہا۔ انہوں نے خطے میں قیامِ امن کے لیے وزیراعظم شہباز شریف کی کوششوں کو قابلِ تحسین قرار دیتے ہوئے یقین دہانی کرائی کہ ترکیہ، پاکستان کی سفارتی کاوشوں کی ہر ممکن حمایت جاری رکھے گا۔
وزیراعظم نے ترک صدر کی میزبانی اور روایتی ترک مہمان نوازی پر شکریہ ادا کیا اور فورم کے کامیاب انعقاد پر انہیں مبارکباد پیش کی۔ ان کا کہنا تھا کہ انطالیہ ڈپلومیسی فورم تیزی سے ایک مؤثر عالمی مکالماتی پلیٹ فارم کے طور پر ابھر رہا ہے۔
دونوں رہنماؤں نے مشرقِ وسطیٰ کی تازہ صورتحال سمیت اہم علاقائی پیش رفت پر تبادلۂ خیال کیا۔ وزیراعظم نے صدر ایردوان کو پاکستان کی جانب سے جنگ بندی میں توسیع اور مذاکرات کی بحالی کے لیے جاری سفارتی کوششوں سے آگاہ کیا، تاکہ پائیدار امن معاہدے کی راہ ہموار کی جا سکے۔
اس موقع پر دونوں قائدین نے اس امر پر زور دیا کہ موجودہ حالات میں دستیاب مواقع سے بھرپور فائدہ اٹھاتے ہوئے خطے میں دیرپا اور مستحکم امن کے قیام کو یقینی بنایا جائے۔
پاکستان اور ترکیہ کے تاریخی، گہرے اور برادرانہ تعلقات کا اعادہ کرتے ہوئے دونوں رہنماؤں نے دوطرفہ روابط کی مثبت پیش رفت پر اطمینان کا اظہار کیا۔ اس کے ساتھ ہی اس بات پر اتفاق کیا گیا کہ اعلیٰ سطحی اسٹریٹجک تعاون کونسل (HLSCC) کا آٹھواں اجلاس رواں سال انقرہ میں منعقد کیا جائے گا۔
فریقین نے جاری منصوبوں پر عملدرآمد کو تیز کرنے اور اقتصادی تعاون کے نئے امکانات تلاش کرنے کی ضرورت پر بھی زور دیا، تاکہ دوطرفہ شراکت داری کو مزید وسعت دی جا سکے۔
ملاقات کے اختتام پر وزیراعظم شہباز شریف اور صدر رجب طیب ایردوان نے اس عزم کا اعادہ کیا کہ پاکستان اور ترکیہ کے مابین اسٹریٹجک شراکت داری کو مزید مضبوط بنایا جائے گا، جو مشترکہ تاریخ، بھائی چارے اور خطے میں امن و خوشحالی کے مشترکہ وژن پر استوار ہے۔