تحریر: ڈاکٹر فرقان حمید
صدر ایردوان کی جانب سے ترکیہ میں 14 مئی 2023ء کو صدارتی اور پارلیمانی انتخابات کروانے کے اعلان کے بعد مغربی میڈیا نے صدر ایردوان کے خلاف بڑے منظم طریقے سے پراپگنڈہ مہم کا آغاز کررکھا ہے۔سب سے پہلے برطانوی جریدے دی اکانومسٹ نے آئندہ انتخابات میں صدرایردوان کے مقابلے میں اپوزیشن کو یہ انتخابات جیتنے کی ضرورت ہےکیونکہ صدر ایردوان ملک میں اپنی ڈکٹیٹر شپ قائم کرچکے ہیں اور اس ڈکٹیٹر شپ کو ختم کرنے کے لیے اپوزیشن کا جیتنا بے حد ضروری ہےلیکن اپوزیشن کے درمیان ابھی بھی اختلافات موجود ہیں اور وہ اب جبکہ انتخابات میں صرف چند ماہ باقی رہ گئے ہیں صدارتی امیدوار کے نام پر ہی متفق نہیں ہوسکے ہیں۔
اگرچہ جریدے کی اس اشاعت میں صدر ایردوان کے اپوزیشن کے مقابلے میں جیتنے کے واضح امکانات موجود ہونے کو تو تسلیم کیا جا رہا ہے لیکن اسی جریدے نے بعد کی اشاعت میں صدر ایردوان کو ترکوں اور دنیا کی نظروں سے گرانے کے لیے اپنے سرورق پر صدر ایردوان کی ترکیہ کے پرچم پر بے ہودہ انداز میں تصویر پیش کرنے کے علاوہ جلی حروف میں
Turkey’s looming dictatorship تحریر کرتے ہوئے صدر ایردوان کو نشانہ بنایا ہے جس پر ترکیہ بھر میں شدید ردِ عمل کا اظہار کیا گیا ہے اور دنیا بھر سے سوشل میڈیا کے ذریعے دی اکانومسٹ جریدے کے خلاف لاکھوں کی تعداد میں ٹویٹس کی گئیں۔ صدر ایردوان کے اطلاعاتی امور کے ڈائیریکٹر فخر الدین آلتون نے دی اکانومسٹ میگزین کے سرورق پر شائع خبر سے متعلق اپنے شدید ردعمل کا اظہار کرتے ہوئے کہ جریدے نے اشتعال انگیز سرخیوں اور اشتعال انگیز تصاویر شائع کرتے ہوئے جریدے کو سستی شہرت، ڈس انفارمیشن اور پروپیگنڈا کے ذریعے کم ہوتی ہوئی اشاعت کو بڑھانے کی ناکام کوشش کی ہے۔ آلتون نے کہا کہ ترک عوام نے بارہا جمہوریت، مساوات اور آزادی کے لیے سڑکوں پر نکل کر ڈیموکریسی کے ساتھ اپنی وابستگی کا اظہار کیا ہے۔ انہوں نے کہا کہ ترکیہ میں ڈیمو کریسی کے تحفظ کے لیے ترک عوام نے 15 جولائی 2016 کو فتح اللہ دہشت گرد تنظیم کی حکومت کا تختہ الٹانے یا بغاوت کرنے کی کوشش کو اپنی جانوں کا نذرانہ پیش کرتے ناکام بنادیا اور ملک کو جمہوریت کی راہ پر گامزن رکھا۔ انہوں نے کہا کہ صدر ایردوان نے جتنے بھی انتخابات میں حصہ لیا ان میں کامیابی ہی حاصل کی ہے ۔ انہوں نے کہا کہ نام نہاد صحافیوں کی ڈیموکریسی ہی کے ذریعے منتخب صدر ایردوان سے نہ ختم ہونے والی نفرت ناقابل فہم ہے۔ ترک ڈیموکریسی بڑی متحرک ڈیموکریسی ہے اور ترک باشندے سیاسی نظام پر مکمل طور پر بھروسہ کرتے ہیں۔
بلوم برگ نے صدر ایردوان کے صدارتی انتخابات کے بارے میں اپنے تجزیے میں لکھا ہے کہ مغربہ رہنما ، صدر ایردوان کو شکست سے دوچار دیکھتے ہوئے خوشی محسوس کریں گےکیونکہ صدر ایردوان نے روس سے میزائل ڈیفنس سسٹم خرید کر نیٹو کی سلامتی کو نقصان پہنچایا ہے، سویڈن اور فن لینڈ کی رکنیت کو روک کر اتحاد کو ناکام بنا دیا ہے، یورپ کو پناہ گزینوں کی آمد سے بار بار دھمکیاں دی ہیں، اور حالیہ مہینوں میں یونان کے خلاف بڑھتا ہوا جنگجو موقف اختیار کیا ہے۔بلوم برگ کے مطابق ترکیہ 20 ساال کے سنگین معاشی بحران سے گزر رہا ہےاور غریب عوام جو اس سے قب ہمیشہ آق پارٹی کی حمایت کرتے رہے ہیں اس بار ایسا ممکن نہیں ہے۔ اس لیے مغربی رہنما اپوزیشن کی کامیابی کی امید لگائے بیٹھے ہیں اور یہی وجہ ہے کہ مغربی رہنما ، ترکیہ میں انتخابات کا روز کانٹوں پر بسر کریں گے۔
دی اکانومسٹ اور بلومبرگ کے بعدجرمن جریدہ سٹرن اپنی مخالفت میں ان سب کو اپنے پیچھے چھوڑتے ہوئے ترکیہ اور صدر ایردوان سے متعلق اپنے تجزیے میں تضحیک آمیز تاثرات استعمال کرتےہوئےصدرایردوان کو ERDOĞAN DER BRANDSTIFTER یعنیEDOGAN ARSONIST قرار دیتے ہوئے اسے اپنے سرورق پر جگہ دی ہے۔
اسٹرن میگزن نے لکھا ہے کہ صدر ایردوان بین الاقوامی اسٹیج پر بڑی قدو کاٹھ والی شخصیت دکھائی دیتے ہیں لیکن اب ان کو اپنے ہی گھر میں اقتدار جاری رکھنے کے لیے انتھک جدوجہد کرنی پڑ رہی ہےاور خزانے کا منہ کھولنے کی ضرورت محسوس ہو رہی ہے۔ کیا ایردوان شکست قبول کرسکتے ہیں؟ ان کے اتحادی نیشنلسٹ موومنٹ پارٹی کے اراکین فوج اور پولیس میں اتنی بھاری تعداد میں جگہ بناچکے ہیں کہ اگر ایردوان انتخابات میں عوامی اکثریت حاصل نہیں کر پاتے تو وہ اس کے باوجود برسر اقتدار رہ سکتے ہیں۔ ایردوان اقتدار میں رہنے کے لیے بے ایمانی اور ہر حربہ استعمال کرنے سے گریز نہیں کریں گے۔ میگزین نے لکھا ہے کہ صدر ایردوان صدر پوتن ، یوکرین اور مغرب کے ساتھ تو مذاکرات کرتے دکھائی دیتے ہیں لیکن اس کے ساتھ ہی ساتھ وہ نیٹو میں ویٹو استعما ل کرتے ہوئے ، نیٹو کو نیچا دکھانے اور نئے اراکین کی راہ کو مسدود کرنے کے ساتھ ساتھ شام میں جنگ کو اپنے مقاصد کے لیے استعمال کررہے ہیں۔
دوسری جانب جسٹس اینڈ ڈولپمینٹ پارٹی کے ترجمان عمر چیلک نے اپنے سوشل میڈیا اکاؤنٹ پر بیان دیتے ہوئے کہا ہے کہ مغربی میڈیا نے بڑے منظم طریقے سے صدر ایردوان کے خلاف سیاہ پراپیگنڈا مہم شروع کرکھی ہے۔
سویڈن میں قرآنِ پاک کے اسکینڈل کے بعد سویڈن کے نیٹو کی رکنیت کے دروازے بند کرنے پر بلومبرگ نے شدید ردِ عمل کا باعث بننے والی خبر میں لکھا ہے کہ نیٹو کی توسیع میں ایردوان کے تاخیری حربوں کو استعمال کرنے کی ہرگز اجازت نہیں دی جانی چاہیے۔بلوم برگ نے سویڈن اور فن لینڈ کو نیٹو کی رکنیت کی راہ میں رکاوٹ بننے پر صدر ایردوان کو "ضدی” رہنما قرار دیتے ہوئے لکھا ہے کہ صدر ایردوان انتخابات سے قبل قومیت پسند ترک باشندوں کے ووٹ حاصل کرنے کی کوششوں میں مصرف ہیں جبکہ صدر ایردوان کی ضد کی وجہ سے یورپ کی سلامتی داؤ پر لگی ہوئی ہے۔بلومبرگ نے نیٹو رہنما وں سے14 مئی سے پہلے دونوں ممالک کی رکنیت کی منظوری کے لی صدر ایردوان پر دباو ڈالنے کا مطالبہ کیا ہے۔
ادھر سویڈن کے دارالحکومت سٹاک ہوم میں ترکیہ کے سفارت خانے کے سامنے قرآن کریم کو نذر آتش کر نے پر صدر ایردوان نے اپنے شدید ردِ عمل کا اظہار کرتے ہوئے ایک گھٹیا ذہن کا گھناؤنا حملہ قرار دیا اور کہا کہ قرآنِ کریم کو نذر آتش کرنے کے بعد اب سویڈن ہم سے نیٹو کی رکنیت کے بارے میں حمایت کرنے کی ہرگز توقع نہ رکھے۔ ترکیہ نے اب یہ دروازہ بند کردیا ہے کیونکہ سویڈن کو اب اپنے تحفظ کے لیے نیٹو کی نہیں اسلام دشمن عناصر کی ضرورت ہے۔ صدر ایردوان نے کہا کہ اس مہذب ، جدید ڈیموکریسی کی دنیا میں انسانی حقوق اور آزادیوں کی ایک بہت ہی سادہ تعریف کی گئی ہے۔ فرد کے حقوق اور آزادیاں صرف وہاں تک جائز ہیں جہاں دوسرے انسان کے حقوق اور آزادی شروع ہوتی ہے۔ کسی فرد کو مقدس ہستیوں یا مقدس کتابوں کی توہین کرنے کو آزادی کا نام ہرگز نہیں دیا جاسکتا ۔ صدر ایردوان کے شدید ردِ عمل ہی کے نتیجے میں مغربی میڈیا جو ادھار کھائے بیٹھا تھا نے صدر ایردوان کے بارے میں باقاعدہ سیاہ پراپگینڈہ مہم کا اغاز لیکن ان کی یہ پراپگنڈہ مہم دراصل صدر ایردوان کے لیے نعمت ِغیر مترقبہ سے کم نہیں ہے۔