قونصلیٹ جنرل آف پاکستان کی جانب سے استنبول میں یومِ پاکستان کے موقع پر پرچم کشائی کی تقریب میں بڑی تعداد میں پاکستان کمیونٹی کی شرکت کی ۔
قونصل جنرل نعمان اسلم نے پاکستان کے قومی ترانے کی دھن پر قومی پرچم لہرایا۔ اس موقع پر قونصل جنرل نے اسلامی جمہوریہ پاکستان کے صدر ڈاکٹر عارف علوی اور وزیراعظم محمد شہباز شریف کے پیغامات پڑھ کر سنائے ۔
قونصل جنرل نے اپنے خطاب میں قومی دن کی اہمیت پر روشنی ڈالتے ہوئے کہا کہ حکومت پاکستان ملک کو درپیش موجودہ چیلنجز سے آگاہ ہے اور اس نے ملک کو ان چیلنجز سے نکالنے کے لیے ایک جامع حکمت عملی اپنائی ہوئی ہے۔
انہوں نے اس موقع پر تحریک پاکستان کے ہیروز اور پاکستان کے قومی مقاصد، استحکام اور ترقی کے لیے کردار ادا کرنے والوں کو زبردست خراج تحسین پیش کیا ۔
قونصل جنرل نے برادر جمہوریہ ترکیہ کے ساتھ پاکستان کے مضبوط تعلقات پر روشنی ڈالی۔ انہوں نے ترکیہ میں آنے والے حالیہ تباہ کن زلزلے کا خصوصی ذکر کرتے ہوئے کہا کہ حکومتِ پاکستان اور عوام نے آخری متاثرہ کی بحالی تک ترک بھائیوں اور بہنوں کے ساتھ تعاون جاری رکھنے کے عزم کا اعادہ کیا ۔
پرچم کشائی کی تقریب کا اختتام زلزلہ کے متاثرین اور پاکستان اور ترکیہ کی سلامتی اور خوشحالی کے لیے دعا کے ساتھ ہوا۔