صدر رجب طیب ایردوان نے ایسکی شہر کے ضلع میحال غازی کی میئر زینب گونیش کو اپنی خصوصی دعوت پر ترکیہ گرانڈ نیشنل اسمبلی (TBMM) میں منعقدہ جسٹس اینڈ ڈیولپمنٹ پارٹی (آق پارٹی) کے پارلیمانی گروپ اجلاس میں مدعو کیا، جہاں وہ اُن کے ہمراہ نشست پر جلوہ افروز ہوئیں۔
اجلاس کے دوران میئر زینب گونیش کی موجودگی کو غیر معمولی پذیرائی حاصل ہوئی اور ہال تالیوں سے گونج اٹھا۔ اُن سے اظہارِ یکجہتی کے لیے ایسکی شہر سے تعلق رکھنے والی سو خواتین بھی سفید دوپٹے اوڑھے پارلیمنٹ پہنچیں اور اجلاس میں شریک ہوئیں۔
گروپ اجلاس سے قبل زینب گونیش صدر ایردوان کے پہلو میں بیٹھیں اور اُن کی تقریر کو اشکبار آنکھوں کے ساتھ سنا۔ صدر ایردوان جب پُرجوش استقبال کے بعد خطاب کے لیے روسٹرم پر آئے تو انہوں نے خصوصی طور پر میئر میحال غازی اور اُن کے ساتھ آنے والی خواتین کا ذکر کرتے ہوئے کہا کہ جس طرح ایک صدی قبل جنگِ آزادی میں اناطولیہ کی خواتین نے سفید دوپٹے اوڑھ کر جدوجہد میں حصہ لیا تھا، اُسی روایت کی جھلک آج پارلیمنٹ کے اس ہال میں نمایاں ہے۔ انہوں نے کہا کہ عوام کے ووٹوں سے مسلسل تین ادوار سے اپنے ضلع کی خدمت انجام دینے والی ایک باحجاب اور شلوار پوش خاتون سیاست دان کی حیثیت سے زینب گونیش اناطولیہ کی ہزار سالہ وقار اور عظمت کی نمائندہ ہیں۔
صدر ایردوان نے اپنے خطاب میں 28 فروری کے دور کی یاد دلاتے ہوئے اُس ‘ فاشسٹ، متکبر اور پست ذہنیت’ کی شدید الفاظ میں مذمت کی جو ماضی میں بالخصوص باحجاب خواتین کے تعلیمی اور پیشہ ورانہ حقوق سلب کرنے کا باعث بنی۔ انہوں نے کہا کہ وہ عناصر جنہوں نے برسوں ہیڈ اسکارف پہننے والی خواتین کو جامعات اور سرکاری اداروں سے باہر رکھا، انہوں نے اناطولیہ کی روایتی پوشاک، یازما، تولبند، شلوار، شال ، احرام اور فستان، کا مذاق اڑایا، آج بھی یہ عناصر اسی تنگ نظر سوچ کے نمائندہ ہیں۔ صدر نے واضح کیا کہ حکومت نے کبھی پابندیوں اور جبر کی اس ذہنیت کو قبول نہیں کیا اور نہ آئندہ کرے گی، اور جو لوگ ماضی کے تاریک دنوں کو دوبارہ زندہ کرنے کی کوشش کریں گے اُن کے مقابل ڈٹ کر کھڑے ہوں گے۔
انہوں نے کہا کہ خواتین کو دھمکانے یا اُن پر انگلی اٹھانے والوں کے لیے میدان خالی نہیں چھوڑا جائے گا۔ اپنے خطاب کے اختتام پر صدر ایردوان نے جنگِ آزادی کی نامور خواتین کرداروں، شریفہ باجی،قارا فاطمہ اور نینے خاتون، کا حوالہ دیتے ہوئے کہا کہ اُن کے نقشِ قدم پر چلنے والی تمام باوقار خواتین کو وہ نہایت احترام کے ساتھ سلام پیش کرتے ہیں اور دعا گو ہیں کہ یہ جذبۂ محبت و یکجہتی قائم و دائم رہے۔
اجلاس کے دوران میئر زینب گونیش صدر کے کلمات سن کر جذبات پر قابو نہ رکھ سکیں اور اُن کی آنکھیں نم ہو گئیں۔ یاد رہے کہ حالیہ دنوں میں اپنے لباس کے باعث سوشل میڈیا پر تنقید کا سامنا کرنے والی میئر کو صدر ایردوان نے بذاتِ خود ٹیلیفون کر کے حوصلہ دیا تھا۔ گفتگو کے دوران صدر نے انہیں بدھ کے روز ہونے والے گروپ اجلاس میں ایک سو خواتین کے ہمراہ سفید لباس اور سفیدروائتی ترک دوپٹے( جوکہ پاکستانی خواتین کا اسٹائل بھی ہے ) کے ساتھ شرکت کی دعوت دی تھی۔ انہوں نے اس موقع پر سویلین آئین کی تیاری اور موجودہ آئینی ڈھانچے سے نجات کے عزم کا بھی اظہار کیا اور کہا کہ حکومت اس مقصد کے لیے اپنی کوششیں جاری رکھے ہوئے ہے۔ بعد ازاں صدر نے پارٹی کی مرکزی مجلسِ عاملہ (MYK) کے اراکین کو بھی آگاہ کیا کہ زینب گونیش سو سفید دوپٹہ اوڑھے خواتین کے ہمراہ اجلاس میں شریک ہوں گی۔
یوں ترک پارلیمنٹ کا یہ اجلاس نہ صرف سیاسی لحاظ سے بلکہ سماجی اور علامتی اعتبار سے بھی ایک اہم منظر پیش کرتا رہا، جہاں اناطولیہ کی روایتی شناخت، خواتین کی نمائندگی اور ماضی کی پابندیوں کے خلاف واضح مؤقف کو ایک بار پھر اجاگر کیا گیا۔