ترکیہ کے شہر چورم میں قدرت کے عجائبات: ہمالیہ سے کیپاڈوکیا تک کے عنوان سے منعقد ہونے والے چغتائی آرٹ ایوارڈز 2026 کی تقریبِ تقسیمِ انعامات آج تاریخی شہر چوروم میں نہایت وقار کے ساتھ منعقد ہوئی۔
اس تقریب میں پاکستان کے ترکیہ میں سفیر، عزت مآب ڈاکٹر یوسف جنید، چوروم کے گورنر علی چان ، میئر حلیل ابراہیم آشگن اور صوبائی ڈائریکٹر برائے قومی تعلیم جمیل چالار نے شرکت کی۔ اس موقع پر چوروم گورنریٹ، سفارت خانۂ پاکستان، ترک وزارتِ قومی تعلیم کے نمائندگان کے علاوہ طلبہ، اساتذہ اور ذرائع ابلاغ کے افراد بھی بڑی تعداد میں موجود تھے۔
اپنے خطاب میں سفیر ڈاکٹر یوسف جنید نے پاکستان اور ترکیہ کے مابین گہرے برادرانہ تعلقات کو اجاگر کرتے ہوئے کہا کہ یہ رشتہ مشترکہ تاریخ، یکساں اقدار اور باہمی احترام پر استوار ہے۔ انہوں نے کہا کہ اس سال کا موضوع دونوں ممالک کے قدرتی اور ثقافتی ورثے کی بھرپور عکاسی کرتا ہے اور ان کے درمیان یکجہتی اور ہم آہنگی کی علامت ہے۔ نوجوان فنکاروں کی حوصلہ افزائی کرتے ہوئے انہوں نے اس امر پر زور دیا کہ فن ایک ایسی عالمی زبان ہے جو مختلف معاشروں کے درمیان فہم و ادراک کو فروغ دیتی اور عوامی روابط کو مستحکم بناتی ہے۔
گورنر علی چان نے اپنے خطاب میں دونوں ممالک کے درمیان تاریخی و ثقافتی روابط کو مزید مضبوط قرار دیتے ہوئے کہا کہ پاکستان اور ترکیہ کی برادرانہ دوستی وقت کے ساتھ ساتھ مزید مستحکم ہوئی ہے۔ انہوں نے اس بات پر زور دیا کہ ثقافتی سرگرمیاں اور نوجوانوں کی شمولیت اس دوستی کو مزید فروغ دینے میں کلیدی کردار ادا کرتی ہیں۔
میئر حلیل ابراہیم آشگن نے چوروم کے ثقافتی ورثے اور بین الاقوامی تعاون کے لیے اس کی کشادگی کو اجاگر کرتے ہوئے کہا کہ چغتائی آرٹ ایوارڈز جیسے اقدامات نہ صرف فنونِ لطیفہ کی حوصلہ افزائی کرتے ہیں بلکہ نوجوان نسل کی تخلیقی صلاحیتوں کے ذریعے اقوام کے درمیان دوستی کو مضبوط بنانے کا مؤثر ذریعہ بھی ہیں۔
مقابلے کے نتائج کے مطابق چوروم فائن آرٹس ہائی اسکول کی طالبہ نہیر ایلان نے پہلی پوزیشن حاصل کی، جبکہ ایرم دوکباش دوسری اور اوزیجدر سوشل سائنسز ہائی اسکول کی ایلف بیرا یلدرم تیسری پوزیشن کی حقدار قرار پائیں۔
یہ ایوارڈز معروف پاکستانی مصور عبدالرحمن چغتائی کے نام سے منسوب ہیں اور ترکیہ میں پاکستان کا سفارت خانہ 2011 سے ہر سال ان کا انعقاد کر رہا ہے۔ اس کا مقصد ترکیہ بھر کے ہائی اسکول کے طلبہ میں فنونِ لطیفہ کے فروغ اور ثقافتی تبادلے کو تقویت دینا ہے۔ گزشتہ برسوں میں یہ مقابلہ انقرہ، قونیہ، بورصہ، بتلیس، آدانا، ازمیر اور استنبول سمیت مختلف شہروں میں منعقد ہو چکا ہے، اور ہر بار پاکستان اور ترکیہ کے مابین دوستی اور بھائی چارے کے رشتے کو مزید مضبوط بنانے کا باعث بنا ہے۔