صدر ڈاکٹر عارف علوی اور وزیراعظم شہبازشریف نے نئے سال کے آغاز پر قوم اور عالمی برادری کو مبارکباد دی ہے اور پاکستان کی ترقی اور خوشحالی اور دنیا میں امن کیلئے دعا کی ہے۔
نئے سال کے موقع پر اپنے الگ الگ پیغامات میں انہوں نے پاکستان کو امن، ترقی اور خوشحالی کا گہوارہ بنانے کیلئے ملکر کام کرنے کی ضرورت پر زور دیا۔
صدر نے اپنے پیغام میں کہا کہ قوم کو گزشتہ سال سے مختلف چیلنجز درپیش ہیں لیکن سخت محنت، قربانی، عزم اور ہمت سے اس صورتحال پر قابو پالیا ہے۔انہوں نے کہا کہ نئے سال کے آغاز پر قوم کو درپیش چیلنجوں سے نمٹنے کیلئے ہمیں ترجیحات کا درست طریقے سے تعین کرنا ہوگا۔
صدر نے کہاکہ ہمیں پاکستان کو خوشحال، ترقی یافتہ، جمہوری اور مستحکم ملک بنانے کیلئے قومی یکجہتی، اتحاد، تنظیم، مسلسل محنت، جذبے اور اخلاص کی ضرورت ہے۔وزیراعظم نے اپنے پیغام میں امید ظاہر کی کہ نیا سال پاکستان سمیت پوری دنیا سے بھوک، جنگ، دہشتگردی، جرائم، فرقہ واریت اور طبقاتی تقسیم کے خاتمے کا سال ہوگا۔
وزیراعظم نے ملک کی اقتصادی صورتحال کی بہتری، سیلاب متاثرین کی بحالی، دہشتگردی کے خاتمے اور عوام کی مشکلات میں کمی کیلئے ملکر کام کرنے کے اپنے عزم کا اعادہ کیا۔
سپیکر قومی اسمبلی راجہ پرویز اشرف نے نئے سال کے موقع پر پوری پاکستانی قوم کو دلی مبارک باد دی ہے۔
انہوں نے امیدظاہر کی کہ یہ سال وطن عزیز میں خوشحالی اور امن لائے گا۔ادھر وزیراطلاعات ونشریات مریم اورنگزیب نے سب کو نئے سال کی مبارک باددیتے ہوئے دعا کی ہے کہ اس سال کے دوران لوگوں کو افراط زر، دہشت گردی ، ظلم وستم ، ناانصافی ، جھوٹ اور نفرت سے نجات حاصل ہو۔