صدر ایردوان نے استنبول میں حماس کے سیاسی بیورو کے چیئرمین اسماعیل ہنیہ سے ملاقات کی جو کہ ڈھائی گھنٹے تک جاری رہی۔
ملاقات میں غزہ کی صورتحال پر تبادلہ خیال کیا گیا جہاں
اسرائیل کے حملے 194 روز سے جاری ہیں۔ علاقے سے ہر منٹ میں نئی افسوسناک خبریں آتی رہتی ہیں۔خطے میں شہادتوں کی تعداد 33 ہزار 970 ہو گئی ہے۔
صدر ایردوان، جو کہ غزہ میں امن کے لیے ہر قسم کے مذاکرات میں ثالثی کا کردار ادا کر رہے ہیں، نے استنبول میں اسماعیل ہنیہ کے ساتھ ساتھ حماس کے ذمہ دار خالد مشعل سے بھی ملاقات کی۔
اسماعیل ہنیہ اور ایردوان نے غزہ کی تازہ ترین صورتحال، جنگ بندی کی کوششوں اور انسانی امداد کی ترسیل پر تبادلہ خیال کیا۔
یاد رہے کہ ترکیہ غزہ میں انسانی المیے کو ختم کرنے اور خطے میں بڑھتی ہوئی کشیدگی کو کم کرنے کے لیے اپنے سفارتی اقدامات بھرپور انداز میں جاری رکھے ہوئے ہے۔
دوسری جانب ہانیہ کے خاندان کو حال ہی میں اسرائیلی حملے میں نشانہ بنایا گیا تھا۔ اس حملے میں ہانیہ کے تین بیٹے اور ان کے کئی پوتے شہید ہو گئے تھے۔ صدر ایردوان نے اسماعیل ہنیہ سے اس موقع پر تعزیت بھی کی۔جبکہ اس سے قبل وہ ٹیلیفون پر بھی ہانیہ سے اسرائیل کے حملے میں ہونے والی شہادتوں پر افسوس کا اظہار کر چکے ہیں ۔
