عالمی یومِ ماحولیات کے موقع پر ڈی ایٹ سیکریٹریٹ کے زیر اہتمام پہلی ورچوئل نمائش D-8 Voices for a Zero-Waste Future کا افتتاح کردیا گیا۔ اس نمائش کا مقصد فضلے کو وسائل میں بدلنے، ماحولیاتی چیلنجز کو پائیدار ترقی کے مواقع میں تبدیل کرنے اور رکن ممالک کے درمیان سبز معیشت کے فروغ کو تقویت دینا ہے۔
اس ورچوئل شوکیس میں ڈی ایٹ رکن ممالک اور اقوامِ متحدہ کے ماہرین کو ایک پلیٹ فارم پر جمع کیا گیا ہے، جہاں زیرو ویسٹ کے جدید تصورات، سرکلر اکانومی کے کامیاب منصوبوں اور ماحول دوست اختراعات کو نمایاں کیا جا رہا ہے۔ یہ اقدامات اس بات کی عکاسی کرتے ہیں کہ پائیدار ترقی صرف ایک ماحولیاتی ضرورت نہیں بلکہ اقتصادی ترقی، سرمایہ کاری اور اجتماعی خوشحالی کا بھی اہم ذریعہ بن چکی ہے۔
اس موقع پر D-8 Circularity Compendium کا اجرا بھی کیا گیا، جسے ڈی ایٹ ممالک کے درمیان علم و تجربات کے تبادلے، سبز سرمایہ کاری کے فروغ اور عملی تعاون کو مضبوط بنانے کی جانب ایک اہم پیش رفت قرار دیا جا رہا ہے۔ یہ compendium رکن ممالک کو ایسے پائیدار ماڈلز سے روشناس کرائے گا جو وسائل کے مؤثر استعمال، فضلے میں کمی اور ماحول دوست ترقی کے اہداف کے حصول میں مددگار ثابت ہوسکتے ہیں۔
ڈی ایٹ سیکریٹریٹ کے مطابق، ماحولیاتی مسائل سے نمٹنے کے لیے مشترکہ عزم، اختراع اور شراکت داری ناگزیر ہیں۔ زیرو ویسٹ مستقبل کی جانب یہ اقدام نہ صرف رکن ممالک کے درمیان تعاون کو نئی جہت دے گا بلکہ ایک زیادہ سرسبز، مضبوط، وسائل کے بہتر استعمال پر مبنی اور خوشحال مستقبل کی تعمیر میں بھی اہم کردار ادا کرے گا۔