ڈی -ایٹ نے مصر کے تاریخی شہر اسوان کو سال 2026 کے لیے ‘ڈی-8 سیاحتی شہر ‘ قرار دیے جانے کو غیر معمولی اہمیت کا حامل قرار دیتے ہوئے کہا ہے کہ یہ انتخاب دنیا کے دلکش ترین ثقافتی و تاریخی مراکز میں سے ایک کو عالمی سطح پر نمایاں کرنے کا مؤثر ذریعہ ثابت ہوگا۔
ڈی-8 کی جانب سے جاری بیان میں کہا گیا ہے کہ دریائے نیل کے دلکش کناروں پر آباد اسوان نہ صرف مصر کی عظیم تہذیبی وراثت کا آئینہ دار ہے بلکہ یہاں قدیم آثار، رنگا رنگ نوبین ثقافت اور دل موہ لینے والے قدرتی مناظر ایک منفرد ہم آہنگی کے ساتھ جلوہ گر ہوتے ہیں۔ اسوان کا انتخاب اس حقیقت کا اعتراف ہے کہ یہ شہر اپنی تاریخی عظمت کے ساتھ ساتھ جدید دور میں پائیدار سیاحت کے ایک ابھرتے ہوئے عالمی مرکز کے طور پر بھی نمایاں ہو رہا ہے۔
بیان میں مزید کہا گیا کہ اس اقدام کا آغاز 2025 میں انطالیہ کو پہلے ‘ڈی-8 سیاحتی شہر’قرار دینے سے ہوا تھا، اور اسوان کا انتخاب اس سلسلے کی توسیع اور ارتقاء کی واضح علامت ہے۔ یہ اقدام رکن ممالک کے درمیان سیاحتی تعاون کو فروغ دینے، باہمی روابط کو مستحکم بنانے اور سیاحت کے شعبے میں نئے مواقع پیدا کرنے کے لیے ایک مؤثر پلیٹ فارم فراہم کرتا ہے۔
ڈی-8 کے سیکرٹری جنرل سہیل محمود نے اس موقع پر مصر کی حکومت اور عوام کو دلی مبارکباد پیش کرتے ہوئے اسوان کے انتخاب کو ایک ‘ اہم سنگِ میل’ قرار دیا۔ انہوں نے امید ظاہر کی کہ اس فیصلے سے نہ صرف اسوان عالمی توجہ کا مرکز بنے گا بلکہ سیاحوں کی آمد میں اضافہ ہوگا اور ڈی-8 ممالک کے درمیان سیاحتی تعاون کو مزید تقویت ملے گی۔
اعلان کے مطابق سال 2026 کے دوران اسوان ڈی-8 سیاحتی سرگرمیوں کا مرکز رہے گا، جہاں مختلف تقریبات، تشہیری مہمات اور مشترکہ منصوبوں کے ذریعے اس شہر کی عالمی شناخت کو مزید اجاگر کیا جائے گا۔ ان اقدامات میں سرکاری و نجی شعبوں کے درمیان قریبی تعاون کو فروغ دینا، سیاحت کے شعبے میں جدت اور پائیدار ترقی کو یقینی بنانا بھی شامل ہے۔
ڈی-8 نے اپنے رکن ممالک، سیاحتی اداروں، صنعت کے ماہرین اور ترقیاتی شراکت داروں پر زور دیا ہے کہ وہ اس مشترکہ کاوش میں فعال کردار ادا کریں۔ اسوان کے انتخاب کو ایک موقع کے طور پر استعمال کرتے ہوئے باہمی روابط کو فروغ دیا جائے، عوامی سطح پر روابط کو مضبوط کیا جائے، ثقافتی مکالمے کو وسعت دی جائے اور سیاحت کے شعبے میں مشترکہ حکمت عملی کو آگے بڑھایا جائے۔
ماہرین کے مطابق اسوان کو یہ اعزاز ملنا نہ صرف مصر کی سیاحتی صنعت کے لیے خوش آئند پیش رفت ہے بلکہ یہ ڈی-8 پلیٹ فارم کے تحت رکن ممالک کے درمیان اقتصادی و ثقافتی روابط کو مستحکم بنانے کی جانب ایک اہم قدم بھی ہے۔