ڈی -ایٹ کے سیکرٹری جنرل سہیل محمود نے بعد میں ایک بیان دیتے ہوئے کہا کہ آذربائیجان کے دارالحکومت باکو میں منعقد ہونے والے ورلڈ اربن فورم (WUF) کے تیرہویں اجلاس کی افتتاحی تقریب میں شرکت میرے لیے باعثِ اعزاز رہی، جہاں آذربائیجان کے صدر، عزت مآب الہام علی ایف کے بصیرت افروز افتتاحی خطاب کو سننے کا موقع بھی ملا۔ عالمی سطح پر غیر معمولی اہمیت کے حامل اس فورم نے دنیا بھر کے پالیسی سازوں، ماہرین، شہری منصوبہ سازوں اور بین الاقوامی اداروں کو ایک پلیٹ فارم پر جمع کر دیا ہے تاکہ مستقبل کے محفوظ، پائیدار اور مضبوط شہروں کے تصور کو عملی شکل دی جا سکے۔
یہ عالمی فورم 17 سے 22 مئی 2026 تک حکومتِ آذربائیجان اور UN-Habitat کے اشتراک سے منعقد کیا جا رہا ہے، جس کا مرکزی موضوع ‘دنیا کو رہائش فراہم کرنا: محفوظ اور مضبوط شہر اور کمیونٹیز’ رکھا گیا ہے۔ فورم میں دنیا کے 182 ممالک سے چالیس ہزار سے زائد مندوبین نے رجسٹریشن کرائی، جن میں سربراہانِ مملکت، وزراء، میئرز، اعلیٰ سرکاری نمائندگان، بین الاقوامی ماہرین، ماہرینِ تعمیر و ترقی، ماحولیاتی اداروں کے نمائندے اور سول سوسائٹی کے اراکین شامل ہیں۔
باکو میں جاری یہ عالمی اجتماع نہ صرف شہری ترقی اور پائیدار رہائش کے حوالے سے اہم پالیسی مباحث کا مرکز بنا ہوا ہے بلکہ موسمیاتی تبدیلی، آبادی میں تیزی سے اضافے، انفراسٹرکچر کے دباؤ اور جدید شہری چیلنجز سے نمٹنے کے لیے عالمی تعاون کے نئے امکانات بھی پیدا کر رہا ہے۔ فورم میں اس امر پر خصوصی توجہ دی جا رہی ہے کہ آنے والے برسوں میں شہری آبادی کے بڑھتے ہوئے دباؤ کے باوجود ایسے شہر تشکیل دیے جائیں جو محفوظ، ماحول دوست، انسانی ضروریات سے ہم آہنگ اور قدرتی آفات کے مقابلے میں زیادہ مضبوط ہوں۔
بین الاقوامی مبصرین کے مطابق، آذربائیجان کی جانب سے اتنے بڑے عالمی اجتماع کی کامیاب میزبانی اس بات کا ثبوت ہے کہ ملک عالمی سفارت کاری، ماحولیاتی مباحث اور بین الاقوامی تعاون کے میدان میں مسلسل اپنی اہمیت منوا رہا ہے۔ 2024 میں عالمی ماحولیاتی کانفرنس COP29 کی کامیاب میزبانی کے بعد ورلڈ اربن فورم کا انعقاد آذربائیجان کے لیے ایک اور تاریخی سنگِ میل قرار دیا جا رہا ہے، جس نے اسے عالمی تقریبات کے ایک مؤثر اور قابلِ اعتماد میزبان کے طور پر مزید مستحکم کیا ہے۔